28 мая.

Канон преподобному Пахомию Великому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Сле́з твои́х тече́ньми пусты́ни безпло́дное возде́лал еси́, и и́же из глубины́ воздыха́ньми во сто́ трудо́в уплодоноси́л еси́, и бы́л еси́ свети́льник вселе́нней, сия́я чудесы́, Пахо́мие о́тче на́ш, моли́ Христа́ Бо́га спасти́ся душа́м на́шим.

Кано́н свята́го. Гла́с 2.

Пе́снь 1.

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.

Припев: Преподо́бне о́тче Пахо́мие, моли́ Бо́га о нас.

Наде́явся бла́гости твои́х нра́вов, усе́рдно тебе́ пе́снь ра́бски возглаша́ю, но мо́й, богогла́се, у́м светолу́чными сия́ньми, твои́ми мольба́ми просвети́, Пахо́мие преизря́дне.

Припев: Преподо́бне о́тче Пахо́мие, моли́ Бо́га о нас.

Безстра́стия жела́нием те́плым, о́тче, одержи́мь, ве́щныя увяди́л еси́ страсте́й во́лны, Пахо́мие, и дости́гл еси́, любо́вию вперя́емь, сего́ теку́щаго сия́ния, преблаже́нне, Божества́.

Сла́ва Отцу́ и Сы́ну и Свято́му Ду́ху:

Ра́дости испо́лнил еси́, му́дре, небе́сныя чи́ны, Творца́ позна́в всея́ тва́ри: во храни́лищи бо навы́кл еси́ иму́щаго неизрече́нную си́лу, Сего́, богоно́се, ве́рно уче́ньми наказу́емь.

И ны́не и при́сно и во ве́ки веко́в. Ами́нь.

Богородичен: Превы́шши была́ еси́, Чи́стая, всея́ неви́димыя и ви́димыя, Присноде́во, тва́ри: Зижди́теля бо родила́ еси́, я́коже благоизво́ли воплоти́тися во утро́бе Твое́й. Его́же со дерзнове́нием моли́ спасти́ ду́ши на́ша.

Пе́снь 3.

Ирмос: Процвела́ е́сть пусты́ня, я́ко кри́н, Го́споди, язы́ческая неплодя́щая, Це́рковь, прише́ствием Твои́м, в не́йже утверди́ся мое́ се́рдце.

Припев: Преподо́бне о́тче Пахо́мие, моли́ Бо́га о нас.

Якоже еле́нь прите́кл еси́ к воде́, преподо́бне, и, окропле́н бы́в креще́нием святы́м, ро́су прия́л еси́, е́юже услади́ся се́рдце твое́.

Припев: Преподо́бне о́тче Пахо́мие, моли́ Бо́га о нас.

Не терпя́ще тве́рдости зре́ти твое́й, преподо́бне, де́монстии полцы́, богоно́се, воздержа́тельныя искуше́ния тебе́ разли́чная простро́ша.

Сла́ва Отцу́ и Сы́ну и Свято́му Ду́ху:

Яко свяще́нное стяжа́в житие́, бы́л еси́ по́стником, Пахо́мие, законополо́жник и пе́рвый во́ждь, Христу́ сия́ приве́л еси́, сла́вне, в Не́мже утверди́ся твое́ се́рдце.

И ны́не и при́сно и во ве́ки веко́в. Ами́нь.

Богородичен: Чи́ни удиви́шася Ангельстии, Пречи́стая, и челове́ческая устраши́шася сердца́ о рождестве́ Твое́м, те́мже Тя́, Богоро́дице, ве́рою почита́ем.

Та́же седа́лен, гла́с 8.

Сле́з ту́чами твою́ ду́шу напои́в бога́тно, о́тче му́дре, многопло́дный доброде́телей твои́х пожа́л еси́ кла́с и, па́стырь овца́м преподо́бным бы́в, на зла́це сия́ воздержа́ния воспита́л еси́. Те́мже разре́шся от жития́ сла́вно, оте́ческим, Пахо́мие, лико́м сочета́лся еси́. Сего́ ра́ди вопие́м ти́: моли́ Христа́ Бо́га согреше́ний оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

Со́лнца о́блаче разу́мнаго, Боже́ственнаго Све́та свети́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́нное мое́ се́рдце омы́й пото́ки умиле́ния, покая́ния же слеза́ми и от тиме́ния мя́ очи́сти де́л мои́х, да любо́вию зову́ Ти́: Богоро́дице Присноде́во, моли́ Христа́ Бо́га прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Пе́снь 4.

Ирмос: Прише́л еси́ от Де́вы, не хода́тай, ни Ангел, но Са́м, Го́споди, вопло́щся, и спа́сл еси́ всего́ мя́, челове́ка. Те́м зову́ Ти́: сла́ва си́ле Твое́й, Го́споди.

Припев: Преподо́бне о́тче Пахо́мие, моли́ Бо́га о нас.

Яко изря́ден прави́тель бы́л еси́, Пахо́мие, мона́шеских собо́ров: виде́нием бо, прему́дре о́тче, извести́лся еси́, доброде́тели воздви́гнути попече́ние.

Припев: Преподо́бне о́тче Пахо́мие, моли́ Бо́га о нас.

Ду́ха Свята́го зарю́ прие́м, звезда́ пресве́тлая, сия́ющая благода́тию, бы́л еси́ все́м, и́хже наста́вил еси́ ко спасе́ния приста́нищу твои́ми уче́ньми.

Припев: Преподо́бне о́тче Пахо́мие, моли́ Бо́га о нас.

Житие́ твое́, богоно́се, преблаже́нне Пахо́мие, пра́вило изве́стно мона́шествующих бы́сть, и́мже ны́не живу́т твои́м после́дующии, о́тче, боже́ственным уче́нием.

Сла́ва Отцу́ и Сы́ну и Свято́му Ду́ху:

Уязвля́емь Влады́чнею любо́вию, погаси́л еси́ пло́ти пристра́стие воздержа́нием, Пахо́мие, все́ житие́ твое́, я́ко благово́нну же́ртву, освяти́л еси́.

И ны́не и при́сно и во ве́ки веко́в. Ами́нь.

Богородичен: Тя́ приста́нище спасе́ния и сте́ну недви́жиму, Богоро́дице Влады́чице, вси́ ве́мы, ве́рнии: Ты́ бо моли́твами Твои́ми от бе́д избавля́еши ду́ши на́ша.

Пе́снь 5

Ирмос: Хода́тай Бо́гу и челове́ком бы́л еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Припев: Преподо́бне о́тче Пахо́мие, моли́ Бо́га о нас.

Любо́вию Бо́жиею, уче́нием бесе́довал еси́ Ду́ха, из ни́хже просвеща́емь, доброде́тели соверше́ние прия́л еси́, от страсте́й измени́в душе́вное устрое́ние.

Припев: Преподо́бне о́тче Пахо́мие, моли́ Бо́га о нас.

Моли́твенника Твоего́, по́стника приво́дим Тебе́, Влады́ко, того́ ра́ди прося́ще просвеще́нием благода́ти просвети́тися и Твои́м всеору́жием всегда́ сохрани́тися.

Сла́ва Отцу́ и Сы́ну и Свято́му Ду́ху:

Укрепи́в у́м за́поведей соблюде́ньми, Пахо́мие, пло́ти взыгра́ние твои́м воздержа́нием увяди́л еси́ и па́стырь показа́лся еси́ боголюбе́знаго со́нма.

И ны́не и при́сно и во ве́ки веко́в. Ами́нь.

Богородичен: Моли́ Твоего́ Сы́на и Го́спода, Де́во Чи́стая, пле́нным избавле́ние от проти́внаго обстоя́ния, и на Тя́ упова́ющим умире́ние дарова́ти.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподо́бне о́тче Пахо́мие, моли́ Бо́га о нас.

Всегуби́тельная де́монская попра́л еси́, о́тче, кова́рства, Влады́ки твоего́ оде́ян си́лою и кресто́м честны́м огражда́емь.

Припев: Преподо́бне о́тче Пахо́мие, моли́ Бо́га о нас.

Умно па́че вре́менных проразсуди́в ве́чнующая, боле́зни воздержа́ния претерпе́л еси́, преподо́бне, и душа́м строи́тель бы́л еси́.

Сла́ва Отцу́ и Сы́ну и Свято́му Ду́ху:

Во́льне обнища́в ду́хом, о́тче, безсме́ртное и непрее́мное на небесе́х наслажде́ние и несказа́нное бога́тство восприя́л еси́.

И ны́не и при́сно и во ве́ки веко́в. Ами́нь.

Богородичен: Неискусому́жно, Де́во, родила́ еси́ и ве́чнуеши Де́ва, явля́ющи и́стиннаго Божества́, Сы́на и Бо́га Твоего́, о́бразы.

Конда́к, гла́с 2.

Свети́льник све́тел показа́лся еси́ в конце́х, пусты́ню же гра́ды сотвори́л еси́ мно́жествы мона́шескими, са́м себе́ распе́н, кре́ст тво́й на ра́мо взе́м, и воздержа́нием те́ло изнури́л еси́, моля́ непреста́нно о все́х на́с.

Икос:

Пресве́тлая блаже́ннаго па́мять, други́й яви́ся де́нь спасе́ния на́м, све́тлостию воздержа́ния, но́щь глубоку́ страсте́й отгоня́щи и вседоброде́тельным дея́нием све́тло облиста́ющи, в не́йже ясна́ звезда́ и светла́ яви́ся. Ве́рно пе́сни с весе́лием Пахо́мию боже́ственному принесе́м: с высоты́ бо зря́, просвеща́ет на́с и дае́т ми́р неоску́ден, моля́ непреста́нно о все́х на́с.

Пе́снь 7.

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ е́сть, Христо́с же простре́ богочести́вым отроко́м ро́су духо́вную, Сы́й благослове́н и препросла́влен.

Припев: Преподо́бне о́тче Пахо́мие, моли́ Бо́га о нас.

Кре́постию оде́явся Влады́чнею, я́ко пра́х, сладостра́стия жития́ попра́л еси́, любо́вию побежда́емь нетле́нныя жи́зни, е́йже ны́не и причасти́лся еси́, с ли́ки Ангел, о́тче, водворя́яся.

Припев: Преподо́бне о́тче Пахо́мие, моли́ Бо́га о нас.

Се́рдце стяжа́в чи́сто, ви́дети сподо́бился еси́ все́ми Неви́димаго, отсю́ду я́коже блаже́н служи́тель, о́тче, бы́л еси́, поя́ Благоде́теля и Препросла́вленнаго.

Сла́ва Отцу́ и Сы́ну и Свято́му Ду́ху:

Правосла́вную му́дрость ты́ стяжа́в, Еди́ницу Тричи́сленную, Тро́ицу Единосу́щную, преблаже́нне, пропове́дал еси́ и Сло́ва стра́шное воплоще́ние, научи́л еси́ пе́ти Благоде́теля, я́ко препросла́вленна во ве́ки.

И ны́не и при́сно и во ве́ки веко́в. Ами́нь.

Богородичен: Святы́х Святе́йшую Тя́ разуме́ем, я́ко еди́ну, ро́ждшую Бо́га непреме́ннаго, Де́во Нескве́рная, Ма́ти Безневе́стная, все́м бо источи́ла еси́ ве́рным нетле́ние Боже́ственным рождество́м Твои́м.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся́ дела́ Госпо́дня, Го́спода.

Припев: Преподо́бне о́тче Пахо́мие, моли́ Бо́га о нас.

По́стных я́ве воображе́ния от Ангела научи́вся, му́дре, от Боже́ственнаго повеле́ния. Имиже ны́не пита́еми, благоче́стия пито́мцы, пе́сньми зову́ще: благослови́те, вся́ дела́ Госпо́дня, Го́спода.

Припев: Преподо́бне о́тче Пахо́мие, моли́ Бо́га о нас.

Якоже мо́лния, вели́кими блиста́нии житие́ сия́ющее все́м возсия́ воздержа́ния твоего́, всему́дре, благоче́стно Зижди́телю зову́щим: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Тя́, па́че ума́ из нерожде́нна Отца́, пре́жде ве́к рожде́нна, Христе́, сла́вя, пропове́да Пахо́мий сла́вный и Ду́ха Всесвята́го, еди́но Тро́ицы естество́ ве́дый и Божество́.

И ны́не и при́сно и во ве́ки веко́в. Ами́нь.

Богородичен: Две́рь Тя́ Све́та, Де́во Богома́ти, благоче́ствующе, имену́ем, Отчее бо сия́ние, соеди́ншееся пло́ти дебельству́, па́че естества́ родила́ еси́, Пречи́стая. Его́же пое́м, вся́ дела́ Госпо́дня, Го́спода.

Песнь 9

Ирмос: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная. Те́м Всепе́тую Богоро́дицу велича́ем.

Припев: Преподо́бне о́тче Пахо́мие, моли́ Бо́га о нас.

Луча́ми благода́ти озари́вся, Пахо́мие, я́ко ве́рен служи́тель Бо́гу предстои́ши и наслади́тися сла́вы сподо́блься неразруши́мыя. Те́мже честны́й пра́здник тво́й велича́ем.

Припев: Преподо́бне о́тче Пахо́мие, моли́ Бо́га о нас.

Исплете́ся тебе́ вене́ц, я́ко победи́телю, Пахо́мие, десни́цею живоно́сною и вседержи́тельною, и ны́не пою́щия твою́ па́мять сла́вную сподо́би, блаже́нне, улучи́ти оставле́ние согреше́ний, всеприснопа́мятне.

Сла́ва Отцу́ и Сы́ну и Свято́му Ду́ху:

Плоды́ ны́не объе́м боле́зней твои́х, Пахо́мие, ра́дости наслажда́ешися, я́же па́че ума́, но хода́тайствуя изба́вити твоя́ ученики́, Христа́ умоли́, тя́ ны́не сла́вящия и чту́щия, достосла́вне.

И ны́не и при́сно и во ве́ки веко́в. Ами́нь.

Богородичен: Яко руно́, Пренепоро́чная, до́ждь небе́сный во утро́бе прие́мши, на́м родила́ еси́ пи́щу даю́щаго, благоче́стно Того́ воспева́ющим и Тя́, Всепе́тую Богоро́дицу, испове́дающим.

Свети́лен.

Ангельскаго жития́ жела́я, удали́л еси́ себе́ в пусты́нях и стра́сти покори́л еси́ плотски́я, равноа́нгелен показа́вся, Пахо́мие богоно́се.

Молитва

О свяще́нная главо́, преподо́бне о́тче, преблаже́нне а́вво Пахо́мие, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.